मोहन सरलाई चिन्ने, चिन्न चाहने, माया गर्ने, श्रध्दा गर्ने सबै जना भोली बिहान शनिबार बिहान उपस्थित भइदिनु होला । संयोग पनि गजबको छ । सरको जन्म १९५३ अक्टोबर ५ (२०१० असोज १९) मा भयो । त्यसको ठीक ४१ वर्षपछि युनेस्कोले यही अक्टोबर ५ लाई विश्व शिक्षक दिवस घोषणा गर्यो ।
मोहन सर, असाधारण प्रतिभायुक्त एक साधारण शिक्षक । जसले जीवनभर पढाइरहनुभयो; उज्यालो नहुँदैदेखि राति अबेरसम्म निःशुल्क । २३३ पृष्ठको यस पुस्तकमा सरबारे ४५ जनाले लेख्नुभएको छ । सर एक जना मिथकीय पात्र जस्तो रहनुभयो, जीवनभर । यहाँ उहाँका डायरीका पाना र अन्य दस्तावेज हेर्दा छक्क परिन्छ ।
उहाँले मेरो जीवनमा धेरै प्रभाव छोड्नुभएको छ । मेरो आदर्श हुनुहुन्छ उहाँ । सर जीवित हुँदै सरबारे नागरिक दैनिकमा मैले एक लेख लेखेथेँ । आज उहाँबारेको किताब तयार पार्ने काममा म स्वतःस्फूर्त संलग्न हुन पाएँ । यो मेरो सौभाग्य, म धन्य छु ।
यो योजनाविना भावुकता र प्रेमस्वरूप पूर्णतः स्वयंसेवी रूपमा गरिएको सानो काम हो । तर, यहाँ (केहीको जिज्ञासा भएकाले) भन्नैपर्छ- यो किताब निकाल्न उहाँका विद्यार्थी-शुभेच्छुक धेरैले आर्थिक योगदान गर्न चाहनुभएको भए पनि हामीले कसैसित एक पैसा पनि नलिने निर्णय गर्यौँ । यसमा उहाँका भाइ भूपेन्द्रसिंह थापा, बहिनी सोबिता थापा तथा प्रवीण भण्डारी र मेरो साधनस्रोत उपयोग हुने सौभाग्य मिलेको छ । मोहन सर हामी सबैको साझा हुनुहुन्छ । यो पुस्तक पनि यहाँहरू सबैको साझा हो । सबैको सहयोगले उहाँको दसौँ स्मृति दिवसपछि भए पनि यो काम सम्पन्न भएको छ । पुस्तकको पनि मूल्य राखिएको छैन । आफ्नो प्रति उपस्थित भएर सुरक्षित राख्नुहोला ।
आफू जलेर अरूलाई उज्यालो दिने मैनबत्तीहरूले जीवनकालमै सम्मान, सन्तुष्टि, इज्जत पाउन सकून् । प्रतिनायकहरूको बाक्लो भुइँकुहिरोले नायकहरूको उज्यालो नछोपोस् । आनी छोइङले भनेझैँ अँध्यारोलाई सराप्नुभन्दा सानै भए पनि दीप बाल्ने कोसिस गर्नु जाती ।
भबतु सब्ब मंगलम्
(माथि उल्लेखित अंशका लेखक बिमल आचार्य यस पुस्तकका सम्पादक हुन)
कार्यक्रमको व्यानर
