सल्यान, १४ माघ।
सल्यानको सिद्ध कुमाख गाउँपालिकाले नौमती बाजा वितरण गरेको छ। आइतबार गाउँपालिकाले वडा नम्बर–१ मा रहेको प्रगतिशील स्वास्थ्य आमा समूहलाई नौमती बाजा प्रदान गरेको हो। पुराना कला र संस्कृतिको संरक्षण तथा प्रवर्धन गर्ने उद्देश्यले गाउँपालिकाले यो कदम चालेको हो।
नौमती बाजा हस्तान्तरण गर्दै गाउँपालिका अध्यक्ष भरत गिरीले कला र संस्कृति जोगाउने कार्यमा लाग्ने सबैलाई पालिकाको तर्फबाट पूर्ण सहयोग हुने बताउनुभयो। उहाँले एक वडा, एक नौमतीबाजा समूह अभियान अन्तर्गत वडा नम्बर १ बाट यो कार्यक्रम सुरु गरिएको र क्रमशः अन्य वडामा पनि वितरण गरिने जानकारी दिनुभयो। उहाँले पालिकाले आफ्नै लगानीमा नौमतीबाजा वितरणसंगै बजाउने तालिम प्रदान गरिसकेको र अब अन्य वडाका समूहलाई प्रशिक्षण दिनका लागि यही समूहलाई परिचालन गरिने समेत बताउनुभयो।
गाउँपालिकाले नौमती बाजा प्रदान गरेकोमा आमा समूहले खुशी व्यक्त गर्दै यसको प्रवर्धनमा सक्रिय रुपमा लाग्ने प्रतिवद्धता गरेका छन ।
